រាជធានីភ្នំពេញ៖ សមាគមតន្រ្តីសំនៀងជនពិការបានរៀបចំកិច្ចប្រជុំ ការបូកសរុបលទ្ធផលសកម្មភាពការងារឆ្នាំ២០២៤ និងលើកទិសដៅផែនការសកម្មភាពអនុវត្តបន្តឆ្នាំ២០២៥ ក្រោមអធិបតីភាពដ៏ខ្ពង់ខ្ពស់ លោកជំទាវ ញ៉ែម មរកត រដ្ឋលេខាធិការក្រសួងកិច្ចការនារី និងជាប្រធានកិត្តិយស លោកជំទាវ ឆៃ ច័ន្ទរិទ្ធីសូលីដា រដ្ឋលេខាធិការក្រសួងព័ត៌មាន និងជាអនុប្រធានកិត្តិយស  ឯកឧត្តម ចាប តូ អនុរដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានសមាគម  ដោយមានការអញ្ជើញចូលរួមពីសំណាក់ លោកស្រីទីប្រឹក្សា លោក-លោកស្រី អនុប្រធានសមាគម លោក-លោកស្រី ប្រធាន-អនុប្រធានផ្នែក លោក-លោកស្រី ប្រធាន-អនុប្រធានក្រុម និងបងប្អូនជាជនមានពិការភាពភ្នែក និងកាយសម្បទាសរុប ១០០នាក់ នាថ្ងៃចន្ទ ១៤រោច ខែបុស្ស ឆ្នាំរោង ឆស័ក ព.ស. ២៥៦៨ ត្រូវនឹងថ្ងៃទី២៧ ខែមករា ឆ្នាំ២០២៥ នៅទីស្នាក់ការកណ្តាល សមាគមតន្ត្រីសំនៀងជនពិការ។

ឯកឧត្តម ចាប តូ អនុរដ្ឋលេខាធិការ បានធ្វើរបាយការណ៍សកម្មភាពការងារ របស់សមាគមតន្ត្រីសំនៀងជនពិការជូនថ្នាក់ដឹកនាំ សមាជិក សមាជិកា ពីផែនការសកម្មភាពដែលសមាគមបានអនុវត្តកន្លងមកដូចជា វគ្គបណ្តុះបណ្តាលជំនាញវិជ្ជាជីវៈ ដល់ជនមានពិការភាពភ្នែក និងកាយសម្បទា ផ្នែកតន្រ្តីសម័យ ផ្នែកម៉ាស្សាដៃទេពតាមបែបជប៉ុន ដោយជនមានពិការភាពភ្នែក ផ្នែកកុំព្យូទ័រ (បង្រៀនកុំព្យូទ័រដល់ជនមានពិការភាពភ្នែក និងកាយសម្បទា) ផ្នែកកីឡា ព័ត៌មាន និងវគ្គបណ្តុះបណ្តាលនានាជាច្រើនទៀតរួមទាំងចំណូល-ចំណាយ ការសម្របសម្រួលដល់បងប្អូនជនមានពិការភាពបានចូលសម្រាកព្យាបាលនៅតាមមន្ទីរពេទ្យរដ្ឋដោយឥតគិតថ្លៃ និងស្នើសុំការផ្តល់ឈាមជួយដល់បងប្អូនមានពិការភាពដែលមានជំងឺនិងវះកាត់ ព្រមទាំងបានជួយសម្របសម្រួលការពិនិត្យព្យាបាលជំងឺ ជួយដោះស្រាយបញ្ហាប្រឈមមួយចំនួន ដល់ឪពុកម្តាយបងប្អូនជនមានពិការភាពភ្នែក និងកាយសម្បទា បានផ្តល់កញ្ចប់ឃីតដល់បងប្អូនស្រ្តីមានពិការភាពសម្រាលកូន និងសកម្មភាពការងារទាក់ទងទៅនឹងការប្រឡងចម្រៀងជនមានពិការភាពពានរង្វាន់ ឯកឧត្តម ជា សុមេធី និងលោកជំទាវ ជា ផល្គុន  សមាគមបានលើកគម្រោងការងារសប្បុរសធម៌ចុះជួយបងប្អូនជនមានពិការភាពនៅតាមបណ្តា រាជធានី-ខេត្ត។ 

ថ្លែងក្នុងឱកាសនោះផងដែរ លោកជំទាវ ញ៉ែម មរកត រដ្ឋលេខាធិការក្រសួងកិច្ចការនារី មានប្រសាសន៍ថា ការរៀបចំកិច្ចប្រជុំបូកសរុបការងារឆ្នាំ២០២៤ និងលើកទិសដៅផែនការសកម្មភាពការងារឆ្នាំ២០២៥ នេះធ្វើឡើងក្នុងគោលបំណងស្វែងយល់ពីការលំបាក និងបញ្ហាប្រឈមផ្សេងៗ ស្វែងរកដំណោះស្រាយសមស្រប និងធ្វើការកែលម្អចំណុចខ្វះខាតដើម្បីលើកកម្ពស់សិទ្ធិ និងគាំពារជនមានពិការភាព ព្រមទាំងស្វែងរកជំនួយឧបត្ថម្ភគាំទ្រដល់បងប្អូនជនមានពិការភាព ហើយលោកជំទាវបានថ្លែងអំណរគុណចំពោះលោកជំទាវ ឆៃ ច័ន្ទរិទ្ធីសូលីដា រដ្ឋលេខាធិការក្រសួងព័ត៌មាន និងបានកោតសរសើរចំពោះ ឯកឧត្តម ចាប តូ ប្រធានសមាគម និងក្រុមការងារទាំងអស់ដែលបានខិតខំអស់ពីកម្លាំងកាយចិត្ត អភិវឌ្ឍន៍សមាគម ដើម្បីបម្រើផលប្រយោជន៍សម្រាប់ខ្លួនឯង និងជនមានពិការភាព ហើយជាពិសេសសមាគមមានសំណាងដោយអាណត្តិនេះមានវត្តមានឯកឧត្តមរដ្ឋមន្ត្រី ជា សុមេធី និងលោកជំទាវ ជា ផល្គុន យកចិត្តទុកដាក់ និងជួយឧបត្ថម្ភ គាំទ្រ៕