ខេត្តកំពង់ឆ្នាំ៖ ឯកឧត្តម ចាប តូ អនុរដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ជា សុមេធី រដ្ឋមន្រ្តីក្រសួងសង្គមកិច្ចអតីតយុទ្ធជន និងយុវនីតិសម្បទា បានអញ្ជើញចូលរួម និងមានមតិចំណាប់អារម្មណ៍ក្នុងពិធីបើក-បិទវគ្គបណ្តុះបណ្តាលស្តីពី “សមភាពយេនឌ័រ និងបរិយាបន្នពិការភាព” ដែលរៀបចំឡើងដោយក្រុមការងារសកម្មភាពជនពិការ នៃក្រសួងកិច្ចការនារី ក្រោមអធិបតីភាព លោកជំទាវ ញ៉ែម មរកត រដ្ឋលេខាធិការក្រសួងកិច្ចការនារី លោកជំទាវ យ៉យ នីតា អនុរដ្ឋលេខាធិការក្រសួងកិច្ចការនារី ឯកឧត្តម យិន សាវេន អភិបាលរងនៃគណៈអភិបាលខេត្តកំពង់ឆ្នាំង លោកស្រី ពេជ្រ សូភា ប្រធានមន្ទីរកិច្ចការនារីខេត្តកំពង់ឆ្នាំង រួមទាំងមន្រ្តីក្រសួងកិច្ចការនារី ប្រធាន-អនុប្រធានមន្ទីរ ប្រធាន-អនុប្រធានការិយាល័យ មជ្ឍមណ្ឌលអភិវឌ្ឍន៍ស្រ្តី មកពីខេត្តចំនួន០៦ រួមមានខេត្តកំពង់ឆ្នាំង កណ្ដាល កំពង់ធំ កំពត កែប និងខេត្តកំពង់ចាម លោក លោកស្រី មន្ទីរសង្គមកិច្ចអតីតយុទ្ធជន និងយុវនីតិសម្បទា មន្ទីរការងារ និងបណ្តុះបណ្តាលវិជ្ជាជីវៈ មន្ទីរអប់រំយុវជន និងកីឡា មន្ទីរព័ត៌មាន និងមន្ទីរទេសចរណ៍សរុបប្រមាណ ៤២នាក់ នៅសណ្ឋាគារ សុវណ្ណភូមិ ខេត្តកំពង់ឆ្នាំង កាលពីថ្ងៃទី១៧-១៩ ខែកុម្ភៈ ឆ្នាំ២០២៥។
វគ្គបណ្តុះបណ្តាលស្តីពី “សមភាពយេនឌ័រ និងបរិយាបន្នពិការភាព” នេះធ្វើឡើងដើម្បីពង្រឹង និងបង្កើនសមត្ថភាពដល់មន្ត្រីក្រសួង មន្ទីរកិច្ចការនារីរាជធានី-ខេត្ត មន្ទីរពាក់ព័ន្ធឱ្យបានកាន់តែមានការយល់ដឹង និងជ្រួតជ្រាបពីសមភាពយេនឌ័រ និងបរិយាបន្នពិការភាព។
ថ្លែងក្នុងឱកាសនោះផងដែរ ឯកឧត្តមអនុរដ្ឋលេខាធិការ បានលើកឡើងថា “ស្រ្តីមានពិការភាព បានចូលរួមយ៉ាងសកម្មក្នុងការរួមចំណែកអភិវឌ្ឍន៍សេដ្ឋកិច្ចសង្គមរួមទាំងការបណ្តុះបណ្តាលលើជំនាញវិជ្ជាជីវៈ អប់រំ សិល្បៈ កីឡាស្រ្តីមានពិការភាព ដែលមានការយកចិត្តទុកដាក់ខ្ពស់ពីប្រមុខរាជរដ្ឋាភិបាលកម្ពុជា ពិសេសក្រសួងស.អ.យ. និងក្រសួងកិច្ចការនារី ដែលបានរៀបចំយន្តការច្បាប់នានាជាច្រើនដើម្បីគាំទ្រ និងជួយសម្រួលដល់ជនមានពិការភាព ដូចជាការផ្តល់ប័ណ្ណមូលនិធិសមធម៌សុខាភិបាល កម្មវិធីអត្តសញ្ញាណកម្មគ្រួសារក្រីក្រ ការស្នើសុំសេវាសុខាភិបាលដោយឥតគិតថ្លៃ ការបង្កើតបេឡាជាតិអតីតយុទ្ធជន ជាពិសេសផ្តល់នូវកម្មវិធីនានាពាក់ព័ន្ធជំនាញវិជ្ជាជីវៈ ដើម្បីឱ្យជនមានពិការភាព មានការងារ មុខរបរ សម្រាប់ជួយសម្រាលដល់ជីវភាពរស់នៅប្រចាំថ្ងៃរបស់ពួកគាត់។ វគ្គបណ្តុះបណ្តាលនេះ បានចែករំលែកនូវបទពិសោធន៍ថ្មីៗទាក់ទងនឹង ការស្វែងរកការគាំទ្រ មតិលើបញ្ហាយេនឌ័រ និងពិការភាព តាមរយៈការធ្វើបទបង្ហាញ ពិភាក្សាក្រុម តាមបែបចូលរួម មានវីដេអូ រូបភាព ដើម្បីធ្វើឱ្យសិក្ខាកាមទាំងអស់បានយល់ដឹងកាន់តែច្បាស់៕
